लग्नसमारंभात फटाक्यांमुळे भीषण आग, पाहुण्यांची पळापळ

नांदेड (युवा क्रांती वृत्तसेवा) : काल सावरगाव तालुका मुखेड येथे एका विवाह सोहळ्यात फटाक्यांमुळे मोठी आग लागल्याची धक्कादायक घटना घडली. लग्नाच्या आनंदात हुल्लडबाज मुलांकडून निष्काळजीपणे फोडण्यात आलेल्या फटाक्यांमुळे आग भडकली. काही क्षणांतच आगीने रौद्ररूप धारण केले आणि लग्नस्थळी अफरातफरीचा माहोल निर्माण झाला.

संपूर्ण मंडपात पाहुण्यांची एकच पळापळ उडाली. सुदैवाने या घटनेत कोणतीही जीवितहानी झाली नाही, मात्र मंडपाचा मोठा भाग आणि सजावट जळून खाक झाली. या घटनेनंतर गावात एकच खळबळ उडाली असून, आयोजक व वऱ्हाड मंडळी हादरून गेले आहेत.

स्थानिक नागरिक, पाहुणे व काही तरुणांनी तात्काळ पाण्याच्या टाक्या व आग विझवण्याच्या इतर साधनांनी आग आटोक्यात आणली. अग्निशमन दल घटनास्थळी पोहोचण्यापूर्वीच आग आंशिक नियंत्रणात आली होती, यामुळे मोठा अनर्थ टळला.

या प्रकारानंतर स्थानिक प्रशासनाने सर्व नागरिकांना व विवाह आयोजकांना सतर्कतेचा इशारा दिला आहे. सार्वजनिक ठिकाणी फटाके फोडताना योग्य ती काळजी घेणे आवश्यक असून, फटाके फोडण्यासाठी सुरक्षित जागा निवडावी, जवळ अग्निशमन व्यवस्था असावी व लहान मुलांकडून किंवा निष्काळजीपणे फटाके फोडण्यास सक्त मनाई करावी, असे आवाहन प्रशासनाने केले आहे.

अशा घटनांमुळे आनंदाचा क्षण भयप्रद बनू शकतो. त्यामुळे नागरिकांनी आणि आयोजकांनी जबाबदारीने व सुरक्षिततेची पूर्ण काळजी घेऊनच उत्सव साजरे करावेत, असे आवाहन स्थानिक प्रशासन आणि पोलीस विभागाकडून करण्यात आले आहे